【Now財經台】科技股近期強勢，其中，阿里巴巴(09988)昨日(7日)收市大升約5%，股價今朝(8日)回調，一度低見138.2元，跌近2%，但仍守得住250天線，過去5個交易日，好倉有4470萬元資金坐貨，淡倉亦連續6個交易日流入，5日合計，有逾1000萬元坐貨，阿里將會喺下周三(13日)出業績，投資者可以點部署？
法興證券上市產品銷售部董事蔡秀虹指，雖然阿里好淡倉喺過去5個交易日都有資金流入，但短線嚟睇，確實有部分好倉資金趁昨日正股升先行獲利離場。
業績部署方面，Eva提醒，要注意引伸波幅風險，一般嚟講，業績前相關窩輪嘅引伸波幅會比較硬淨，因為市場對業績有憧憬，但當出完業績，消息明朗化後，引伸波幅往往會比較反覆。
如果投資者想持倉博業績，佢建議揀防守性較高嘅條款，以減低引伸波幅敏感度，可以考慮較貼價嘅產品，例如行使價150元至160元水平，價外約10%，年期方面，可以選擇較長身嘅條款，例如3至4個月到期嘅產品，槓桿約5至6倍。
Eva又話，雖然價外輪槓桿較高、輪價較平，但對引伸波幅好敏感，一旦業績後引伸波幅收縮，對價外輪嘅影響比較大，所以績前部署都係比較適合揀返貼價少少嘅條款。
