【Now財經台】截至早上11時止，過去1小時內《彭博》搜尋量最多港股，依次為小米集團(01810)、泡泡瑪特(09992)、創科實業(00669)、藥明生物(02269)、濰柴動力(02338)。
過去1個月，創科股價喺110至115元窄幅上落，昨日(4日)一度見115元，股價今朝(5日)平開，開市報114.8元，見咗暫時高位，之後走勢轉弱，曾低見109.2元，跌4.8%。創科去年收入及純利齊創新高，公司又做回購，大行亦唱好，目標價介乎120至140元，調整咗一浸後，現時估值吸唔吸引？對集團嚟講，中美關係仍然係最大風險？
信達國際研究部助理經理陳樂怡指，對創科嚟講，未來一定要留意息口走向，之前市場關注美國房地產工程市場，因為減息周期有利呢類工程需求，但依家減息時間一再押後。
Tracy又指，喺各項商品價格偏高下，雖然全球化布局會有幫助，但東南亞生產線面臨高能源價格挑戰，若創科仍可保持經營韌性，現階段係中長線分注吸納時機。
她又提醒，可留意月底若中美元首會面，貿易政策會唔會有驚喜，創科作為出口敏感股或可從中受惠。
