【Now財經台】有「最強蘋果分析師」之稱，天風國際證券分析師郭明錤發文，指OpenAI正跟高通(Qualcomm)、聯發科等合作開發手機處理器，預期2028年量產，消息一出，即時炒起高通股價，後市係咪值得睇好？對其他手機龍頭又有咩影響？
iFast Global Markets副總裁溫鋼城指，高通股價由203美元回落至120美元水平，跌咗約40%，之後就出現反彈，雖然最新傳出一個利好消息，但睇返圖表仍然係陰燭，市場可能仍然擔心公司未來嘅競爭壓力，依家晶片市場已經好成熟，蘋果公司(Apple Inc.)及三星電子(Samsung Electronics)都有自家晶片，高通未來會唔會透過再有新合作，有更多業務發展就要拭目以待。
至於對現有手機商投資價值嘅影響，佢認為，Apple抗跌力相對較強，因為集團生態系統嘅用戶忠誠度高，相比之下，Android系統受到嘅影響可能會較大，內地手機市場競爭亦十分激烈，包括小米集團(01810)等，高通呢次合作可唔可以領先市場仍然係未知之數，不過，若新興市場如南美州、澳洲或歐美地區，新嘅處理器可以喺價錢或性能取勝，可能會有啲著數。
