【Now財經台】寧德時代(03750)擬折讓7%配售H股，配股價628.2元，集資391億元，股價今朝(28日)低開6.7%後，一度失配股價，低見617元，大跌9%。寧德近期資金流都比較多，5日合計，好倉有1400萬元坐貨，集團股價自高位回落，係咪開好倉嘅好時機？
信誠證券聯席董事張智威指，寧德基本面其實幾靚，身處嘅電動車鋰電池業務係黃金賽道，喺歐洲市佔率排第1位，股價今日急挫，主要係為股價由3月初約462元起步，短短個幾月就狂飆至745元，累積好大升幅，市場難免覺得公司踢高股價再「抽水」，所以市場就有啲情緒。
Alvin又話，寧德今次配股唔係為咗還債，而係將資金投入全球新能源項目建設、零碳業務布局及研發，為未來進一步業務及股價鋪路，中長線係好事，股價依家喺620元水平，佢估計，股價喺600元水平會有一定支持，如果見到股價回落到600元至610元水平，可以考慮部署好倉。
