【信報財經新聞】雖然周末期間，美伊談判並未有成果，美國更表示將於今早香港時間10時起開始封鎖霍爾木茲海峽，但美伊雙方態度令市場憧憬最終能達成協議，美股隔晚先低後高，標指更收復美伊戰爭開打以來所有失地。美市收市，道指倒升302點或0.63%，報48219；標指倒升69點或1.02%，報6886；納指倒升280點或1.23%，報23183。
噚晚美股嘅科技股表現唔錯，ALAB進一步上升至160美元水平之上，將個止賺價推高至150美元，等下有冇上返170至180呢啲較合理價格。至於ONDS仲未上返10美元，都係得個等字。至於撈到平貨嘅TSM，阿Man點都坐下先，我自己唔係太貪心，睇今年點都有400美元樓上，但有券商啱啱將佢個目標價上調至515美元，原因係26年第一季銷售額優於公司指引，毛利率預計可以到達區間上端。我就放心坐住等佢升。CRWV上咗100美元頭也不回，局住103美元照追一注貨，暫時都叫生生性性，上咗110美元樓上，用個95美元做防守，博佢上返120-130美元左右。NQ估佢唔到咁勁，打爆晒啲阻力位25300，上到25600先停車。今日個NQ好淡分水嶺喺25500，玩高一級，下方支持25400/25300/25200/25100，之前個25300阻力變支持，而25100-25150條100日線變成大支持位。至於阻力方面25600/25700/25800/25900，暫時25800同25900呢個位阻力唔細。
至於港股今早高開低走，早段黑期於25900水平之上徘徊，今早港股裂口高開268點，其後一度升至25995半日高位，但半日升幅縮水至109點，半日報收25770；國企指數升25點或0.29%，報8627；科技指數升8點或0.17%，報4830。大市成交1214億元，買賣兩閒。騰訊(00700)呢期持續跑輸大市，除咗係南非大股東偶有減持之外，公司預留資金發展AI業務，減少回購，令淡友肆無忌憚沽空騰訊作為舞高弄低大市嘅手段。因為騰訊唔爭氣，大大限制港股反彈動力。
今早見紐約期油已重返100美元之下，似乎市場傾向相信，美伊談判最終能達成協議，而美國反鎖封霍爾木茲海峽，反而係為不久將來重開海峽鋪路。其實談判初期失敗，早已係市場意料之內，即使昨日亞太區股市回調，調整幅度亦相對溫和，明顯係投資者風險胃納逐步回升，已回復戰前形態，個別主題板塊仍吸引資金投入，反映市場已從戰爭爆發初期嘅恐慌情緒穩定落嚟。由於上周五美國公布通數據均合符市場預期，CPI更略低於市場預期，投資者開始排除今年美國聯儲局加息可能。其實一般地緣政治事件，對股市影響較為短暫，只要增長股及AI相關股份盈利增長能見度保持良好，股市於戰爭初期震盪下，反而係低吸機會。
雖然目前仍未能百分百肯定港股已見今年低位，但筆者傾向相信，低位已於第一季出現，而近日亦見市場發出短期見底訊號，5日線分別升穿10日及20日線，只要港股守穩20日線之上，短期仍有機會向上挑戰50日及100日線約26100水平，甚至大型頭肩頂頸線水平即26300。今日港股如能企穩25900，料可挑戰26100水平，不過要企穩仍需要啲時間，能否回復強勢，都係要睇26300能否確認突破。
麥狄文
(徐狄怡‧證監會持牌人)
