【Now財經台】海底撈(06862)中午公布主席兼大股東張勇計劃喺未來12個月，掟唔少於1億元增持公司股份，消息一出，股價午後即拗腰抽高，一度高見15.25元，升近4%，可唔可以跟搭一轉順車？
胤源世創家族辦公室(香港)第一副總裁黃偉豪表示，張勇自海底撈2018年上市以嚟，從來冇增持過，佢選擇喺呢個時候增持，反映佢認為海底撈現價已偏離合理水平，所以吼低位吸納，亦反映管理層睇好公司前景，係一個正面訊號。但佢估計，今次增持對海底撈股價嘅利好作用唔會維持得太耐，呢1億元相對於集團逾800億元市值，只係杯水車薪，單一因素帶嚟嘅刺激作用有限，股價要繼續向上，始終要視乎業務大方向，而唔係單靠大股東增持。
Ravi指出，張勇只係話計劃未來12個月增持，但無明確嘅出手時間，暫時亦睇唔到有明顯啟示作用，所以唔建議投資者跟風追入。
