【信報財經新聞】中東局勢仍未明朗，市場質疑美國與伊朗能否遵守停火協議，紐約期油昨日止跌回升，更一度重上每桶102美元，不過其後升勢回順，今早紐約期油於98美元水平徘徊。隔晚道指早段曾回吐逾200點，其後曾倒升超過400點，收市道指報48185，升幅收窄至275點或0.58%；標指升41點或0.62%，報6824；納指續彈187點或0.83%，報22822。
美國總統特朗普稱，對達成伊朗和平協議持樂觀態度，投資者相信，美伊之間雖然休戰協議脆弱，但停火兩周協議能夠得以維持。重磅科技股普遍繼續反彈，二三線科技股則個別發展。早兩日低吸嘅ALAB穩步向上，噚日收市升3.19%，至盤後再升多3%，暫時可以用返個125元做止賺，讓子彈再飛多一陣。至於ONDS就無咁好彩，只係差嗰少少無到10.5元食糊，又回返去9美元邊，暫時持有住先，望佢生生性性唔好失個防守位。至於NFLX話咁快上返三位數，但就上唔到車，唔想高追唯有耐心再等候，或者要闊佬少少，95-99美元搵位上車。TSM係喺今次美股回調浪當中，成功搵到靚位上車嘅優質股，320美元接嘅貨繼續持有，中線目標都係睇400美元。CRWV宣布擴大與Meta長期合作協議，向後者提供金額達210億美元運算力，股價抽升3.5%，呢個消息令到股價重上返90美元樓上。之前用CRWV同NBIS做個比較，結果出嚟果然係NBIS防守力好少少，今次中東戰爭美股跌浪裡，NBIS都無穿過95美元，有喺110左右上到車，噚日就一嘢彈返超過一成，破埋132元個阻力位，有上車嘅又無被震走，可以用個130元做止賺參考繼續持有。
至於NQ噚晚上到最後一個阻力25350前回頭，今早喺25200-25300之間徘徊，今晚分水嶺上移至25250，支持25150/25050/24950，阻力25350/25450/25550，25100-25150條100日線要好好守住，守得住100日線，反彈之勢可持續。
噚晚美國公布2月份個人開支升0.5%，增幅低過預期的0.6%，期內聯儲局重視的通脹指標─核心個人消費開支平減指數(Core PCE)按年升3%，漲幅略低過前一個月3.1%，符合預期，而2月份個人收入減少0.1%，與預期增加0.3%背道而馳。Carson Group環球宏觀策略員Sonu Varghese認為，聯儲局喺中東危機前已面臨通脹問題，目前所有人都睇到通脹熾熱，當局卻依然未有正視。白宮經濟委員會主任Kevin Hassett向霍士財經表示，伊朗戰爭只產生短暫影響，相信美國今年經濟將增長4%或5%。美國10年期債息先升後挫3.4個基點，至4.254厘，對息口較敏感嘅2年期債息倒跌4.6個基點，至3.748厘。美滙指數一度跌0.58%，至98.63，日圓下滑0.45%，至159.3兌每美元。留意今晚公布核心CPI指數，睇下會唔會為嚟緊嘅息率路徑提供更多線索。
港股噚日喺假後急升後回吐，恒生指數低開136點後持續受壓，最多跌239點，見25653低位，其後喺北水掃貨下跌幅收窄，全日跌140點或0.54%，報收25752，成交額則減至2449億元。至於今早恒生指數高開139點或0.54%，其後一度重上兩萬六關，最多升321點，高見26073，半日升155點或0.6%，報25907，二萬六未企穩，26100條50日線同100日線暫時見有影；國企指數升52點或0.6%，報8664；科技指數升51點或1.06%，報4873。主板成交1247億元。投資者喺美伊暫時停火進行談判期間，態度變得審慎，未有積極入市。
事實上，佔恒指比重較大嘅科技股表現麻麻，昨日除騰訊(00700)之外，幾隻重磅科技股普偏受壓，限制大市升幅。雖然美伊雙方暫時停火，但以色列卻向黎巴嫩施襲，令伊朗再度封鎖霍爾木茲海峽，令油價持續高企。即使目前料美伊雙方均有意結束戰事，料衝突規模將較前縮減，但海峽通航情況仍有待觀察，港股預料短期仍會隨戰事消息反覆波動。不過隔晚美股仍維持反彈，帶動夜期及ADR回升，但短線要突破50日及100日線即26100水平仍有難度，而港股目前雖已脫險，但定必要克服26300即大型頭肩頂頸線位置，並企穩方有條件再展升浪。估計短線大市或先行於25300-26300水平上落，暫時都未係可以大舉出擊嘅時候，倉位繼續預留部份現金，以備大市再有震盪時買貨。
麥狄文
(徐狄怡‧證監會持牌人)
