【Now財經台】阿里巴巴(09988)早前發布新一代「千問」模型，股價昨日(1日)反彈完之後，今日(2日)再度受壓，阿里係昨日最多資金流出淡倉嘅個股之一，唔少熱門牛證距離收回價僅5%至不足10%，但槓桿就好高，去到10倍樓上，呢啲牛證值唔值博？
法巴上市衍生產品部銷售及市場推廣主管李梓維表示，人工智能(AI)相關消息暫時對阿里股價冇乜支持，如果投資者想博反彈，8月到期，收回價約114元嘅牛證，同現價相差約5元，要部署長假期就太近，槓桿約10倍，建議投資者考慮CALL輪。
佢解釋，阿里股價近日下跌，較多投資者留意行使價130至140元，較短身嘅CALL，7月至8月到期，槓桿做到8倍，避開長假期相關風險。
