【Now財經台】中東局勢仍然未明朗，繼續困擾投資市場，喺股市資金輪動下，會唔會轉戰防守性較高嘅高息股？股份方面，現時招商銀行(03968)股息率略低過其他國有大行，表現係咪會相對落後？
天風國際李偉傑表示，由於港股重磅科技股近期表現唔好，可能受市場擔心資本開支太大影響，見到資金紛紛轉投高息防守股，其中，內銀股喺業績後仍錄得大成交，雖然內銀盈利冇太大驚喜，但至少冇出現科技股大洗倉嘅情況。佢又指，雖然淨息差收窄，但派息比率仍穩定喺30%水平，相對於中資電訊股70%嘅派息比率，內銀股仍有一定增長空間。
派息方面，4大國有銀行都接近5厘或以上水平，有一定防守力，雖然個別內銀派息比率下降，例如建設銀行(00939)，但派息比率仍可以跟同業睇齊，所以未有一個明確投資方向出現前，內銀股仍然會係市場焦點。
Jason又話，招行以商業模式為主，若未來消費力增加及信用卡業務回暖，估計屆時盈利能力提升，有望彌補返跟同業嘅差距，表現亦未必好似想像中咁差。
