【Now財經台】截至早上11時止，1小時内《彭博》用戶搜尋量最多港股，依次為農夫山泉(09633)、海底撈 (06862)、泡泡瑪特(09992)、小米集團(01810)及老鋪黃金 (06181)。
內地餐飲股海底撈昨日(24日)出咗業績，盈利倒退之餘，亦削減派息，依家海底撈共有1383間餐廳，而且持續擴張，但去年自營餐廳整體翻枱率下跌，點睇集團未來業務前景？
資深證券分析師彭偉新認為，海底撈不斷擴張只係為咗做靚銷售盤數，以減低市場對公司業績嘅擔心，佢又話，餐廳翻枱率可以直接反映受顧客歡迎程度，現時海底撈跌至3.9次，反映市場都唔係太睇好，所以開新店嘅做法只係「遮得一時，遮唔到一世」，而擴張只會增加營運成本及資本開支，加上依家內地餐飲發展趨勢係搞外賣經濟，海底撈現時嘅營運模式只會拖累營運指標，長遠市場都唔會睇好。
股價方面，Castor就認為，業績後直接由去年整個升浪跌返落去，如果股價今日(25日)繼續向下，又上唔返14.5元水平或以上，有機會出現穿底形態。
