【Now財經台】截至早上11時止，1小時內《彭博》搜尋量最多港股，依次為小米集團(01810)、新秀麗(01910)、李寧(02331)、吉利汽車(00175)及地平線機器人(09660)。
小米發布新一代SU7，售價近22萬人仔，比上一代貴4000人仔，董事雷軍日前話，由於供應鏈零部件、內存等材料價格上漲，導致成本增加，所以新車定價有壓力。佢又指，集團未來3年會投資逾600億人仔喺人工智能(AI)領域，市場點睇小米嘅部署？
大華繼顯執行董事梁偉源指，新一代SU7發布後，小米股價今日(20日)大跌，反映投資者對於新車定價有擔心，新一代SU7成本更高，但加價幅度細，市場擔心毛利會受壓。
佢又指，去年內地電動車市場「內捲」問題嚴重，但今年有所緩和，不過，中低檔市場仍要打價格戰，靠性價比吸引買家，市場擔心新車盈利貢獻有限。
梁偉源續稱，投資AI往往好難預測回報，例如要幾耐先可以回本，同埋資金流出現壓力等問題，呢啲不確定性都令小米股價今日下跌。
