【Now財經台】太古(00019)今日中午(12日)派咗去年成績表，收入按年增長10%，基本溢利按年增長8.6%。第二次中期息方面，A股派2.5元，B股派0.5元，分別按年增19%。全年計，太古A及太古B派息增13%。集團指，未來會採用漸進式股息政策回報股東，對比其他大型股，派息算唔算吸引？受戰事影響，國泰航空(00293)要捱貴油，會唔會影響太古未來盤數？
光大證券國際證券策略師伍禮賢指，呢份業績睇到太古整體業務持續改善，收入及基本溢利都好過預期，派息亦唔錯，加上未來派息政策，Kenny認為，中線而言，太古復甦步伐可望維持，為股價帶來支持。
佢續指，太古業務嘅防守性都值得關注，3大業務包括航空、地產及飲料，由於關聯性唔係好大，所以其中一瓣面對壓力時，另外兩瓣都可以保持核心動力。佢估計，太古股價呈大漲小回格局，並對未來上升空間持樂觀看法。
