【Now財經台】港股今日(4日)顯著下挫，恒生指數一度瀉逾800點，插穿25000關，不過，電力設備板塊逆市升，其中，東北電氣(00042)一度勁升近1倍，高見0.71元，哈爾濱電氣(01133)、東方電氣(01072)等亦跑贏大市，點解電力設備股可以逆市跑出？
信達國際研究部助理經理陳樂怡指，之前炒人工智能(AI)、基建，尤其海外市場方面產能拓展慢，電力儲備具備「出海」因素，需求大，加上市場依家對AI概念有戒心，認為可能炒返重資產好啲，畢竟無論AI發展快或慢，電力儲備都唔會被淘汰，有生存空間。
Tracy又話，除咗市場投資風格轉變，亦受惠於綠色能源政策加碼，不過，企業盈利表現幾分化，其中，哈爾濱電氣盈利增速喺去年下半年有重新加快，即使落後但都有業績改善因素驅動估值向重新向上，短線可留意住「兩會」，睇下有冇政策重點落墨。
