【Now財經台】截至早上11時止，過去1小時內《彭博》用戶搜尋量最多港股，依次為稀宇科技(MINIMAX)(00100)、濰柴動力(02338)、泡泡瑪特(09992)、山東墨龍(00568)及紫金礦業(02899)。
MINIMAX昨日(2日)派咗上市後第1份成績表，雖然虧損擴大3倍，但收入按年大升逾1倍，超預期。摩根大通喺1個月內兩度調高MINIMAX目標價，雖然業績「見紅」，但似乎無阻市場繼續睇好呢間人工智能(AI)公司？
方德證券分析師李浩然指，雖然MINIMAX虧損擴大，但市場普遍都唔太擔心，因為公司研發開支增加唔少，主要用喺雲服務及多模型訓練，呢啲都係長線技術投資，唔係追求短線盈利。佢又話，今次呢份業績睇到海外收入亮麗，覆蓋逾200個國家及地區，令投資者有信心集團嘅大語言模型可以成功「出海」。
Eric又話，大部分純大語言模型企業都未上市，喺冇乜選擇下，資金自然湧入MINIMAX，加上國策鼓勵投資AI領域，對純粹開發大語言模型嘅公司較有利。佢估計，喺Anthropic或OpenAI等巨頭上市前，MINIMAX會較易成為炒作焦點。
