【Now財經台】滙豐控股(00005)今日(25日)中午出咗業績，股價最終以全日高位收市，大升逾5%，收報142.7元，集團派息比率維持50%，除咗大數，指引都交到貨，期望2026至2028年平均有形股本回報率(RoTE)達17%，甚至更高，點睇滙控嘅業績指引？
元宇證券投資總監林嘉麒指，改變嘅唔只RoTE，對恒生銀行重組時間亦有重新估算，反映喺1個季度後，市場睇得樂觀咗，甚至埋數比預期好，雖然唔似有好大推動力，但可以維持17%已經係一個高水平，無形中向市場傳達一個訊息，就係滙控業績已有一定穩定性。
派息比率方面，KK就話，要睇返所處地區同以往比率，去判斷今次係咪吸引，滙控以一家國際銀行嚟講，受制於本港經濟狀況，派息比率可以維持50%，已經係非常理想，所以市場都收貨。
