【信報財經新聞】市場觀望特朗普發表國情咨文，不過Meta宣布與超微半導體(AMD)達成龐大合作協議，利好市場氣氛，三大指數反彈，道指高開23點後，升幅擴大至最多491點，收市升370點或0.76%，報49174；標指升52點或0.77%，報6890；納指升236點或1.04%，報22863。市場氣氛又好返啲，呢兩日提到嘅CRWV又再升，已經接近目標價100-120美元嘅底部，有貨嘅持有先，暫時可以用個95美元做防守，坐住等下先，不過噚日急升近一成，或者要抖抖氣，落返95-97美元整固下亦唔奇。至於噚日叫留意嘅SOFI，開市早段亦有位上車，盤後升至19美元，有上車嘅繼續用個16美元做防守，等20至22美元。今日想吼住ALAB，下方支持122-124美元，上方阻力135-137美元，暫時可以利用呢個區間炒吓波幅。
美股嘅道指同標指暫時高位整固，納指表現就差少少，睇嚟整體美股都無咁快向上突破。不過近排調整幅度較大嘅概念股，似乎都搵到支持位，而唔少股份經過一輪調整後，估值開始又去返啲合理同吸引水平，只要市場氣氛持續改善，呢堆股份又可以落鑊爆炒。至於NQ都係咁上下，移動區間暫時喺24200-25500，今日嘅好淡分水嶺喺25050，下方首個支持24950，下一支持24800，盤中較大支持係24700-24750；至於上方阻力25150；盤中較大阻力係25250-25300。
睇返港股呢幾日玩單跳，日升日跌叫人難以捉摸。雖然北水回歸，噚日A股上升，但港股未有跟隨，反而因周一晚美股下挫而低開低走。恒生指數噚日跌491點，收市報26590，成交額2509億元，北水回歸成交回升，但以噚日跌市嚟講，沽壓唔算嚴重。至夜期時段美股回升，港股跟隨反彈，一度重上26800水平，今早黑期接近26800水平徘徊。
今早恒指高開154點，升幅一度收窄至42點，見26632低位，不過A股愈升愈有，港股回勇半日升199點，報26789。國企指數升81點或0.9%，報9088；恒科指升17點或0.34%，報5288。半日成交1222億元，成交方面唔算多，可能因為今日財爺公布今年新一份budget，加上大笨象(00005)中午公布季度業績，缸邊友都按兵不動，加上明日期指結算，港股暫時又無方向，炒鬼無所適從，寧願少做少錯。北水亦唔主動掃貨，半日錄得近17億元淨流出。
上半場市場較為觀望，中午大笨象出咗業績，去年列賬基準稅前盈利299.07億美元，雖然按年跌7.4%，但業績好過市場預期。公司對前景展望都幾樂觀，進一步上調目標，將2026年至2028年每年不計及須予注意項目之平均有形股本回報率目標上調至17%或更高，爭取2028年的收入較2027年增長5%。呢份業績應可帶動大笨象股價向上，不過科技股整體都係一般，暫時個市未有條件向上突破，結算前大市或窄幅上落。而科技股持續疲弱，限制大市升幅，或要待相關股份公布業績，如業績及前景展望理想，或有助扭轉科技股弱勢，港股方有望打破目前僵局。短期大市支持仍為26000-26300，至於27200-27500料阻力仍大。
麥狄文
(徐狄怡‧證監會持牌人)
