【Now財經台】美國最高法院裁決美國總統特朗普(Donald Trump)關稅政策違憲，消息刺激美股3大指數上周五(20日)早段彈高，但收市升少截，其後特朗普宣布再加碼，全球關稅由10%上調至15%，市場會點反應？應唔應該入手有得退稅嘅上市公司？
以立投資管理董事總經理林少陽指，市場未必會太關心今次嘅關稅新聞，呢啲消息由去年4月發酵至今已經接近1年，市場已消化咗唔少，雖然今次裁決或對出口商帶嚟短暫刺激，但長線嚟講，競爭格局唔會有好太變化，投資者應關注企業自身出口競爭力，多過呢啲新聞。
Vincent又提醒，相關關稅退款只係一次性，由於金融市場反應好快，港股今日開市時或已反呢個利好因素，因此，若因為今次呢單消息買入相關股份，其實風險好大。
如果想買出口股，就要睇返美國經濟環境，例如創科實業(00669)，雖然集團生產基地喺內地會受關稅衝擊，但近期美國房地產市場回暖，呢啲公司嘅業務前景或有改善，佢建議唔好因為一單新聞大幅調整資產配置，反而一啲受惠於美國減息周期、基本面有改善嘅股份，先至值得投資。
