【Now財經台】截至早上11時止，1小時內《彭博》搜尋量最多港股，依次為美團(03690)、智譜(02513)、騰訊控股(00700)、藥明生物(02269)及紫金礦業(02899)。
騰訊股價近期表現一般，今日(12日)一度跌逾3%，低見530.5元，集團旗下有人工智能(AI)助手元寶、即時通訊軟件微信及騰訊雲，但似乎冇一瓣做得好標青，呢個會唔會係騰訊股價弱勢其中1個原因？
富途證券高級分析師馮文慧指，近期騰訊股價冇乜表現，可能同最快放農曆新年假期，節日氣氛濃厚有關，估計要等新年後先再有更多資金流入。
Anna又話，騰訊呢幾項業務表現只係中規中矩，相信要等3月出業績時，如果呢啲業務交到功課，股價先會有反彈動力，加上資金依家炒作舊經濟股多過新經濟股，相信騰訊短線會繼續走弱。
