【now.com財經】上海小南國(03666)旗下多間位於上海嘅「小南國」餐廳昨日(10日)突然傳出全部結業。據內媒報道，從唔同消費者得知，多間喺上海嘅「小南國」餐廳突然停業，客人已畀咗嘅年夜飯訂金、儲值卡餘額都退唔到錢，但報道指，珠海及無錫加盟店仍正常運作。
集團昨晚發通告，指上海小南國品牌旗下10間餐廳已暫時停運，以配合策略重整，又稱按金及預付卡等資金可以退還。
受傳聞拖累，上海小南國股價昨日暴瀉，收市報0.025元，瀉逾28%，雖然集團已作出回應，但股價今朝(11日)仍未止瀉，大幅低開12%，開市報0.022元，其後跌幅曾擴大至20%，低見0.02元，但之後收復唔少失地，最新報0.024元，跌4%。
