【Now財經台】藍籌藥股石藥集團(01093)今日(30日)公布，同英國大藥廠阿斯利康(AstraZeneca)達成對外授權協議，潛在總收益高達185億美元，同去年指引嘅50億美元差好遠，不過，石藥股價今日一度大冧近13%，低見9.32元，後市點睇？
富途證券首席分析師譚智樂認為，石藥股價大跌係典型嘅「好消息出貨」，雖然今次喺合作對象及金額都無可挑剔，但睇返石藥股價由去年低位4元起步升至現水平，其實已反映咗呢個醞釀咗半年嘅利好消息，所以依家未必會繼續炒上去，加上撞正大市回落，資金依家趁消息落實獲利都可以理解。
Arnold又話，雖然呢單Deal潛在總收益好龐大，但其實大部分都要睇未來銷售表現，加上減肥藥市場競爭十分激烈，阿斯利康亦唔係最熱藥廠，如果單睇預付款加埋潛在研發里程碑金額，其實大約47億美元，同之前公司指引提及嘅50億美元差唔多，因此，佢預期石藥股價短線會維持整固格局。
