【Now財經台】截至早上11時止，過去1小時內《彭博》用戶搜尋量最多港股，依次為美高梅中國(02282)、比亞迪股份(01121)、優必選(09880)、江西銅業股份(00358)及長和(00001)。
美高梅股價今日(29日)一度重挫逾13%，原因係公司向母企繳交，佔收入1.75%嘅授權費大升1倍，摩根士丹利估計，明年要上繳約12億元，會直接拖累經調整除利息、稅項、折舊及攤銷前盈利(EBITDA)按年跌7%，集團明年營運數據係咪會轉差？
富昌證券聯席董事譚朗蔚指，本來年底有大節日，行業整體表現應該係中性向好，但授權費翻倍會利淡美高梅基本面，以集團去年賺約40億元計，即係預期明年要交12億元授權費，的確會對公司造成好大影響。
Stevan續指，美高梅股價沽壓可能未完全反映晒，所以短線必須小心，睇返技術走勢，15.5元會係重要支持位，如果失守，估計後市都好難樂觀。
