【Now財經台】明日(24日)就係平安夜，坊間一直有句經典諺語「聖誕鐘買滙豐」，雖然去到年尾，大市已經悶悶哋，但滙豐控股(00005)股價近日仍不斷破頂，今年美股及港股係咪真係有「Santa Rally」(聖誕老人行情)？
星漢資產管理行政總裁王榮昆指，流動性改善係背後主因，雖然日本央行息口走向模糊，但感覺上唔係太鷹，市場暫時預期日央行會繼續加息。此外，美國聯儲局結束量化緊縮(QT)政策，開始買美債，加上隔夜逆回購增加，銀行儲備增加等消息，都反映流動性改善，令市場可以較放心，而有「恐慌指數」之稱嘅VIX亦創咗今年新低。
James又指，唯一美中不足係美股第3季業績唔太亮眼，仍主要靠科技7雄(Magnificent 7)帶動。
