【now.com財經】泡泡瑪特(09992)股價不斷尋底，近日持續受壓，一度連190元都守唔住，旗下「吸金王」Labubu人氣明顯跌Watt，二手價已經炒唔起，喺集團陷入低潮之際，公司昨晚有一個人事任命惹人關注，令人有返少少「想像空間」。
Labubu「出道」日子其實唔短，但去到近年被南韓女天團BLACKPINK成員Lisa「一抱爆紅」，喺Labubu似乎「跌落神壇」之際，昨晚突然傳嚟集團委任LVMH大中華區總裁Andrew Hu為非執董。公司似乎同LVMH都幾有緣，事關Lisa緋聞男朋友，正正係LVMH呢個頂級法國奢侈品牌三公子Frederic Arnault，要留意可唔可再一次幫泡泡瑪特及旗下IP「點石成金」。
股價連日受壓嘅泡泡瑪特，受消息帶動，今朝(11日)即刻有得升，一度高見195.7元，升2.7%。
