【Now財經台】內地公布最新一版國家醫保目錄名單，新增114種藥物，有19種則獲納入「商業健康保險創新藥名單」，其中，恒瑞醫藥(01276)入選藥物最多，共有15種，其次係信達生物(01801)，共有7種，依家係咪入手呢兩隻醫藥股嘅好時機？
高歌證券金融首席分析師聶振邦認為，雖然恒瑞股價近日比較弱，但只要有利好消息，股價仍有唔少上升空間。佢又指，恒瑞有唔少藥物入選國家醫保目錄，大部分係腫瘤領域、治癌標靶藥及糖尿病藥，呢啲藥喺內地有好大需求，但由於集團盈利增速唔算快，預期股價會受制80元水平，建議喺70元樓下入手比較安全。
聶Sir續指，今日(8日)正式「染藍」嘅信達生物股價大跌，後市要留意78元至80元有冇支持。佢又話，若港股短期仍然偏弱，唔排除信達生物會繼續跌，如果打算持貨1個月或以上，等股價落到83元再入手會比較好。
