【Now財經台】阿里巴巴(09988)股價連日受制20天線，喺150元至160元上落，今朝(8日)平開後偏軟。資金流方面，好倉連續3個交易日有資金流入，但5日合計僅約200萬元坐貨，淡倉就不斷有資金流出，5日合計有逾500萬元，阿里股價仍未有明確方向，好淡友今日點部署？邊類條款產品較受歡迎？
法興銀行證券上市產品銷售部董事周翰宏指，雖然阿里股價連日窄幅上落，但已經係電商股之中走勢較強嘅股份，反映投資者唔太睇好，唔敢大手買貨之餘，亦唔敢持貨太耐，暫時留意短期可唔可以突破20天線。
佢又話，暫時唔太適宜用CALL或PUT輪做部署，因為最近引伸波幅不斷回落，估計要跌至40窩或以下，CALL及PUT輪先有吸引力，所以用牛熊證做部署較好，雖然股價波幅收窄，但仍要避免揀太貼價條款，收回價價外約7%至10%較理想，即約140元，槓桿做到近10倍。
