【Now財經台】截至早上11時止，1小時內《彭博》搜尋量最多港股，依次為小米集團(01810)、美團(03690)、敏實集團(00425)、泡泡瑪特(09992)及洛陽鉬業(03993)。
小米近排有唔少壞消息，包括電動車「出事」，但公司未就事件詳細「解畫」，小米股價已跌到半年低位，就算出咗新手機K90都幫唔到股價，今日(27日)一度挫4.4%，低見43.88元，公司11月18日就會出業績，點睇小米股價？
天風國際李偉傑指，小米仍受壞消息困擾，呢個情況都反映咗喺股價上，亦被兩家大行削目標，此外，小米推跨年購置稅補貼上限1.5萬人仔，後續要留意汽車銷售毛利有冇受牽連。
技術走勢方面，雖然大市今日向上，但小米不升反跌，仲跌穿200天線，即46.2元水平，估計短期仍要捱沽，如果上唔返200天線，可能要下試大關口位先搵到支持。
