【now.com財經】滙豐控股(00005)將會喺明日(28日)派第3季成績表，不過，今次焦點未必落喺大笨象盤數，亦唔會係回購問題，好大機會係私有化恒生銀行(00011)嘅進展及未來業務發展。
大笨象明日就會放榜，綜合券商預測，第3季列帳基準稅前利潤逾76億美元，按年跌唔夠10%，按季就增長逾20%，收入按年跌逾1%，估計派息10美仙，按年持平。
回購一向係小股東最關注嘅問題之一，不過，滙控之前拋出私有化恒生建議時，已講明連續3季唔做回購，所以呢個問題都可以暫時擺埋一邊。
市場及投資者反而更關注私有化恒生嘅進展、對未來業務影響、會帶來乜嘢協同效益等，要留意管理層會唔會喺業績會上派定心丸比市場及股東。
滙控股會今日(27日)喺業績前先升後跌，午後更愈跌愈多，一度低見101.5元，跌逾1.5%。
