【Now財經台】早前，滙豐控股(00005)提出私有化恒生銀行(00011)，外界隨即揣測係咪想透過私有化，拆咗恒生嘅壞帳炸彈，但兩邊高層都否認，恒生今年上半年本港商業房地產(CRE)相關嘅「具風險貸款」高達660億元，不良貸款率亦創30年新高，喺CRE貸款中，進入「第3階段」(即已違約或嚴重減值)比率高達20%。到底恒生壞帳問題係咪私有化嘅導火線？點睇呢個舉動？
思博資本高級合夥人張宗永認為，本港商業房地產嘅壞帳率增加，無疑係滙控私有化恒生嘅主因，但由於恒生始終係受金融管理局監管嘅持牌銀行，未來仍要符合要求去運作。佢又話，完成私有化後，撤銷恒生上市地位嘅舉動，喺政府角度而言，少一家容易被市場攻擊嘅上市公司係好事，由於唔再係上市公司，投資者或對沖基金嘅信心唔會受影響。
佢又指，私有化對恒生股東嚟講係好事，但短期嚟講，對滙控股東會係一個負擔，但佢認為唔使太擔心，因為公司收購嘅股票金額屬於可負擔能力之內。
