【Now財經台】截至早上11時止，過去1小時內《彭博》搜尋量最多港股，依次為泡泡瑪特(09992)，中遠海控(01919)，小米集團(01810)，銀河娛樂(00027)及大麥娛樂(01016)。
泡泡瑪特股價今日(14日)股價一度大升6%，近期新消費股相繼喺低位反彈，睇返成交及股價走勢，蜜雪集團(02097)及布魯可(00325)表現較好，泡泡瑪特今日升得唔錯，係咪炒作蘋果公司(Apple Inc.)行政總裁庫克(Tim Cook)昨日(13日)同泡泡瑪特創始人王寧，以及LABUBU設計師龍家昇見面嘅消息？如果睇成交及走勢，蜜雪及布魯可係咪比泡泡瑪特更值博？
富途證券首席分析師譚智樂指，蜜雪及布魯可發力追上嚟，未必等於值博率最高，投資者應睇基本面及圖表，過去兩日蜜雪及布魯可相對升得較多，泡泡瑪特值博率變相較低，但現階段順勢博泡泡瑪特，只要肯坐貨及做中線投資係冇問題，但睇基本面及圖表，其實幾隻都差唔多。
Arnold續指，摩根士丹利繼續叫增持泡泡瑪特，目標價睇382元，大摩睇好泡泡瑪特係因為未來6至8個月，當集團越南廠房順利投產及效率提升，出貨量就會大增，所以泡泡瑪特值得做中長線投資，而近期推出嘅「WHY SO SERIOUS」系列反應火熱，可能係市場其中1個短炒誘因。
