【Now財經台】滙豐控股(00005)擬以每股155元私有化恒生銀行(00011)，作價較昨日(8日)收市價有約30%溢價，集團指，未來3個季度唔會進一步回購股份，滙控股價今日(9日)低開2.8%，開市報107.5元，其後一度低見102.5元，大跌7.3%，下試50天線。牛證方面，收回價參考250天線，即87元水平嘅條款，槓桿10倍，想博反彈應該點部署？
法興銀行證券上市產品銷售部董事周翰宏指，呢單Deal短期會對滙控股價有負面影響，集團估值或被重估，所以要再觀察滙控股價新支持位，暫時喺50天線，即102元水平有支持，相信唔少資金會喺呢個水平嘗試博反彈。
Horace又話，用牛證做部署會比較合適，始終今日先傳出呢個消息，加上股價波動，帶動CALL輪引伸波幅上升，未來幾日都有機會維持高位，風險會較大，想用牛證博短線反彈，可以考慮收回價約95元，同現價有約8%距離嘅條款，槓桿可以做到10倍。
