【Now財經台】據《彭博》報道，美國總統特朗普(Donald Trump)昨日(25日)喺社交媒體上發文指，將會向品牌或專利藥品徵收100%關稅，除非相關公司喺美國設製藥廠，同日特朗普亦簽咗行政命令，批准Tiktok出售美國業務嘅框架協議，令Tiktok可以繼續喺美國營運，特朗普動作多多，似乎都利淡美股，美股已連跌3日，港股今朝(26日)都跟跌，投資者現階段應該點部署？
黃國英資產管理董事黃國英指，短期宜審慎部署，始終環球股市整體氣氛差，市場亦十分兩極化，美股明顯轉弱咗唔少，即使有得升，亦唔係表面睇得咁好，加上近日英偉達(Nvidia)宣布向OpenAI投資達1000億美元，意味Nvidia、OpenAI及甲骨文(Oracle)形成「3國共存」局面，不過，OpenAI能唔能夠將人工智能(AI)應用大量變現仍然係一個問號，而市場對呢項投資亦有唔少憂慮，連AI股都備受質疑，所以暫時要特別小心。
投資策略方面，Alex就話，短線宜先觀察市況，做保守部署，但美國最近對烏克蘭態度轉趨強硬，如果真係要入手，石油股可能係較好嘅選擇，內銀及本地銀行股相對較難升得多，建議考慮中國海洋石油(00883)。
