【now.com財經】被內媒形容為創新藥「妖股」，上市唔夠3個月嘅B仔股藥捷安康(02617)，當日以13.15元上市，如果以今日(16日)即市高位計，股價累計狂飆逾50倍，集團股價今日早市一度高見679.5元，勁升逾63%，但去到下午約2點，走勢突然急轉直下，股價「斷崖式」急瀉，收市倒插逾53%，收報192元，全日成交金額逾45億元，市值單日蒸發逾千億元。
公司今日中午出過通告，話留意到股份交易價格及成交量近期出現異動，經作出合理查詢後，不悉股價異動原因。集團又指，業務營運及財務狀況冇重大變動。
藥捷安康今輪升浪觸發點係集團喺上周三(10日)公布咗一個同臨床有關嘅消息，喺往後3個交易日，股價累升逾1.7倍，市值亦水漲船高。
值得留意係，據港交所資料顯示，截至8月31日止，藥捷安康H股發行股數3.0167億股，如果扣除禁售股數，實際可被交易股數只有550.7萬股，意味街貨只得1.72%。
