【Now財經台】物管股係近期大市其中1個焦點，摩根士丹利亦唱好物管股，指經歷「後脫鈎」時代後，物管股下半年將會回復增長，所以上調多隻物管股目標價。不過，摩根大通就叫投資者再睇定啲，因為物管股業績同內房銷售息息相關，而物管企業近年都似乎改變咗策略，將資源集中喺有錢賺嘅項目，並將冇肉食嘅生意收縮，甚至斬纜，其中，以雅生活服務(03319)及中海物業(02669)去年終止嘅在管面積最大，呢種做法係咪會「愈縮愈賺錢」？
紅蟻資本投資總監李澤銘指，物管公司終止在管面積有可能係因為債務危機而被迫終止，或會削弱客戶信心，對物管企業嚟講，在管面積愈大，成本愈低，先可以發揮到最大規模效益，因此，減少在管面積唔一定會幫到盈利。
Alan又話，物管股之中華潤萬象生活(01209)仍然係首選，始終業務較穩定，盈利增長又唔錯，其次就係綠城服務(02869)，因為集團冇債務問題，增長潛力亦較大。
