【now.com財經】《彭博》今日(4日)一單報道震散A股4大指數，報道指，內地監管機構正研究一系列監管措施，避免散戶因投機過熱而損手，包括抑制投機交易等，又要求銀行嚴查借錢炒股。
至於之前成為A股「新股王」、內地人工智能(AI)晶片龍頭寒武紀，今日收市急瀉逾14%，收報1202元人仔，市值單日蒸發約850億人仔，如果以上周四(8月28日)歷史高位1595.88元人仔計，股價回落咗逾24%，更失埋「股王」寶座，不過，寒武紀跌到咁未必同《彭博》嘅報道有關，反而可能有另一個「死因」。
事緣上交所及中證指數公司近日決定調整科創50指數，將會喺下周五(12日)收市後生效，現時寒武紀權重約15%，但單一股票權重唔可以超過10%，基金經理為符合指數規定，要喺短時間內調整持股比例，有數據推算，依家追蹤科創50指數嘅基金，有可能要沽出逾百億人仔嘅寒武紀持股。
