【Now財經台】小米集團(01810)第2季經調整淨多賺75%至108億人仔，超預期，但股價今早(19日)走勢反覆，低開逾2%後，一度倒升1%，高見53元。集團業績好過預期，市場上受歡迎嘅CALL，槓桿3至9倍，活躍牛證槓桿就做到3至15倍，想博反彈嘅投資者應該揀CALL定牛證？
中銀國際證券衍生產品部董事朱紅指，小米交到一份靚成績表，基本面相對硬淨，佢建議投資者趁每次回調開好倉博反彈，值博率會較高。
佢又話，小米股價今早走勢反覆，但仍可守住50元關口，投資者可以考慮留意行使價60元嘅CALL，明年4月到期，槓桿做到5至6倍，或者行使價72元至73元嘅CALL，明年2月到期，槓桿做到6至7倍，呢啲條款都適合部署小米好倉。
