【Now財經台】有傳小米集團(01810)嘅「小米平板8」冇搭載自家研發嘅玄戒O1晶片，小米股價昨日(7日)失守100天線，跌至51.2元嘅1個月低位後，今早(8日)持續受壓，投資者可以點部署？
法興銀行證券上市產品銷售部董事周翰宏指，小米近期出現一浪低於一浪嘅調整浪，但股價已經非常接近150天線，即50元水平呢個重要支持位，未入市嘅投資者可以考慮趁低吸納。
如果投資者想偷步入場，Horace建議投資者揀條款時要更審慎，以往投資者主要揀較價外嘅CALL，行使價60至80元，博小米再破頂，不過，小米股價近期創唔到新高之餘，更反覆回落，所以資金傾向揀較保守嘅條款，行使價55至逾60元，價外約10%至20%，加上小米股價近期弱勢，建議投資者選擇中長期條款，今年10月後到期，槓桿約5至6倍。
