【Now財經台】曹操出行(02643)股價今早(7日)高開逾7%後，升幅擴大，一度勁升逾19%，高見58.9元，創上市新高，成交股數較過去100日同時段增1倍，暫時成交金額逾6540萬元。
曹操出行係半新股，主力做網約車服務，今年6月底上市，股價早前表現麻麻，但近日出現突破，因為市場開始關注集團Robotaxi嘅試點運營，公司計劃明年底推出L4級Robotaxi車輛，有中資券商預期，有助提升集團市佔率及盈利能力。
此外，集團又宣布同勝利證券(08540)簽合作協議，探索虛擬資產代幣化及穩定支付應用，成為內地首家探索RWA(Real World Asset)概念嘅網約車企，估計有助Robotaxi戰略布局。
曹操出行就快出中期業績，要留意公司虧損會唔會進一步收窄，可唔可捕捉到資金輪動嘅注意力。
