【now.com財經】中銀證券早前出咗報告，分析中概股「回歸」，指隨著中美關係緊張，加上美國對中概股嘅監管愈嚟愈辣，呢類股份面對嘅退市壓力唔細，成為中概股「回歸潮」嘅催化劑，而港股有機會成為首選，原因係本港機制靈活、上市門檻較低，又有「同股不同權」政策，為中概股提供一個便捷嘅「回歸」平台。
呢份報告出爐幾日後，最新傳出有喺美國上市，具份量嘅中概股有意「回歸」。
據《彭博》報道，百度集團(09888)旗下內地視訊平台愛奇藝(IQ.US)，計劃今年嚟香港第二上市，集資3億美元，折合逾23億港元，報道指，集團已經同國際投行就第二上市展開磋商。
對於來港第二上市傳聞，愛奇藝回應內媒查詢時指，暫時冇更多訊息可以提供。
受消息刺激，愛奇藝美股昨日(6日)盤前一度大幅抽升，收市升幅顯著收窄，集團股價今年表現一般，暫時累跌逾7%。
