【Now財經台】貓眼娛樂(01896)股價今早(28日)高開近2%後，升幅一度擴大5.8%，高見8.55元，升上5個月高位，成交股數較過去100日平均增逾5倍，半日成交金額逾1.5億元。
內地暑假檔期差唔多過咗三分之二，整體票房未及去年50%，情況似乎唔太樂觀，不過，最近新上畫嘅《南京照相館》票房好好，好大機會成為暑假檔大贏家，所以部分影視股都錄得唔錯嘅升幅，貓眼娛樂係其中之一。
睇返技術走勢，《南京照相館》大受歡迎，帶挈貓眼娛樂股價突破近月雙頂阻力，上返2月因《哪吒2》票房報捷嘅高位，但當時股價喺短時間內大上大落，上方有累積唔少蟹貨，今年暑假票房仍大幅落後於去年同期，投資者要睇實雙頂阻力，如果股價碌返落去，倒不如先行止賺。
