【Now財經台】西藏萬億水電工程刺激基建、水泥、水電設備等股份大升，內地就有近百隻股份漲停板，當中包括中國能源建設(03996)嘅A股，而H股今日(21日)開市即衝高，一度高見1.96元，勁升50%，但升勢好快回順，收市報1.6元，仍大升23%，成交股數較過去100日同時段激增75倍，全日成交金額逾33億元，更打入10大成交榜。
內地有分析指，中國能源建設及中國電建將會係今次西藏項目大贏家之一，A股網民憧憬中國能源建設A股繼續有「一字漲停」，公司過去幾年營業額及盈利穩定，但工程需時最少18年，以1年投入金額計，工程未必對營業額有明顯幫助，市場可能期望太大，今日一升，相對強弱指數(RSI)已上到80以上嘅超買水平。
