【Now財經台】晶片股巨頭英偉達(Nvidia)獲華府開綠燈，H20晶片可以再向中國銷售，估計好快就會出貨，但對內地晶片製造商嚟講就唔係好消息，喺香港上市嘅華虹半導體(01347)、中芯國際(00981)，同埋喺A股掛牌嘅寒武紀，股價應聲向下，點睇H20「解禁」帶嚟嘅影響？
易方資本副基金經理王逸研認為，「國產替代」進程唔會放慢，依家內地有唔同國策扶持晶片廠，同埋鼓勵互聯網公司用國產晶片，華為昇騰(Ascend)及寒武紀晶片實力持續提升，同H20晶片相比，性能唔係差好遠，所以吸引內地廠商持續增加國產晶片採購。
佢又話，H20「解禁」消息會對晶片設計及晶圓代工公司造成打擊，所以中芯股價都跌咗落去。王逸研續指，內地先進產能供應一直好緊張，所以H20「解禁」都唔會影響75納米產能利潤率，喺需求持續強勁下，唔會影響中芯嘅盈收。
