【Now財經台】閱文集團(00772)股價今早(19日)低開4.7%後，跌幅一度擴大至近9%，低見24.1元，收市報24.4元，跌7.5%，連跌第2個交易日，成交股數較過去100日同時段增1倍，全日成交金額逾3.8億元。
閱文喺內地提供閱讀、創作服務平台，以及做知識產權(IP)產品，喺人工智能(AI)熱潮下，閱文曾受惠於有AI作家助手接入DeepSeek，提升創作服務效能，但去年業績都要「見紅」，雖然公司一直有做回購，但都撐唔起股價。
其實閱文整體業務表現唔差，AI對業務嘅推動力，或會逐步反映喺業績上，恒指公司上周五(16日)宣布將閱文踢出科指，根據過往經驗，股價反而有機會升，後市要留意閱文股價會唔會慢慢上返嚟。
