【Now財經台】巨無霸人氣新股寧德時代(03750)今日(13日)第2日招股，綜合券數據，截至今朝約9點，孖展額已突破600億元，以公開發售部分集資逾23億元計，暫時超額認購逾25倍。據《彭博》引述消息指，其實昨日正式開始接受認購訂單前，呢隻巨無霸已經足額認購。
寧德時代一手難求其實都預咗，但公司更向港交所(00388)豁免回撥機制，呢個係非常罕見，要抽中就難上加難，今次香港公售比例只得7.5%，即係只有逾884萬股，相當於88400手畀散戶抽，寧德時代都有解釋，公司話已考慮咗香港散戶嘅利益，雖然冇回撥機制，但初步分配都可以滿足到需求。
除咗冇回撥機制，另一個令搶貨難上加難嘅原因係，唔少人預期呢隻巨無霸好快就會「染藍」及納入港股通，到時股價又會再升多浸。
有券商都坦言，散戶可視乎自己能力去抽，但真係唔好咁大期望，又估計首掛當日「潛水」機會好細，因為基投一定會全力「護盤」。
