【Now財經台】蜂巧資本(Borchid Capital)及集團創辦人屠錚係泡泡瑪特(POP MART)(09992)早期投資者，屠錚亦係POP MART非執董，佢曾經喺2020年公開指，POP MART喺創始人王寧帶領下，只要比10至15年時間公司，有機會成為一家百億美元級別嘅企業，不過，屠錚近日已低調同POP MART「分手」。
據聯交所權益披露顯示，屠錚喺周二(6日)以每股平均價190.2元，沽出386萬股泡泡瑪特，套現逾7億元，如果計埋今年另外兩次出售，3次合共沽出1191萬股，套現逾22億元，手上已經冇任何POP MART持股，清倉離場。
另一方面，蜂巧資本指，由於有基金就快到期，已分3次沽清泡泡瑪特股份。
泡泡瑪特股價今年繼續強勢，曾經只差1蚊就變「雙紅底」，但近期受股東大手沽貨消息影響，股價表現較弱，過去5個交易日累跌近10%，不過，今年以來仍累升逾90%，相信唔少仍有貨在手嘅投資者，仍等緊股價見2字頭。
泡泡瑪特股價今日(8日)一度低見176.8元，挫逾4%，最新仍未重上180元。
