【Now財經台】截至早上11時止，1小時內《彭博》用戶關注度上升最多股份，依次為美高梅中國(02282)、金沙中國(01928)、美團(03690)、友邦保險(01299)及泡泡瑪特(09992)。
賭股近期強勢，金沙今日(6日)一度大升逾6%，「五一黃金周」期間，澳門入境旅客達85萬人次，按年增長40%，參考花旗渠道消息，最高賭注達290萬元，賭場豪客係咪再現？4月整體賭收略勝預期，但僅相當於2019年同期80%，賭收係咪有排都重返唔到疫前水平？
博威環球證券金融首席分析師聶振邦指，之前VIP客量少，但累積咗嘅賭博能力喺今個「五一」長假釋放，但相信「五一」過後，下個高峰要等到「十一黃金周」，暫時只受惠於假期效應，所以要留意未來兩個月嘅賭收表現。
聶Sir續指，疫情前內地經濟表現好，但疫情後，再加上依家嘅關稅戰，令內地經濟面對一定挑戰，賭收的確需時復甦，但佢認為，如果A股表現好，就會製造財富效應，都會有利賭收。
