【Now財經台】渣打集團(02888)今日(2日)中午派咗第1季成績表之後，股價午後一度抽高逾4%，高見117.5元。集團上季稅前基本溢利按年增長近7%，淨利息收入、非利息收入按年增長約4%至5%，淨息差按年擴大18點子至2.12%，但按季收窄9點子，呢份業績係咪都收貨？未來淨息差走勢會係點？
王道資本及家族資產管理執行董事黃敏碩認為，渣打呢份季績收貨，尤其係淨息差及淨利息收入表現都好過同業。
Michael又話，市場預期集團淨息差未來會持續收窄，但只要營運成本及收入比例做得好，加上做多啲財務管理業務，有機會抵銷淨息差收窄帶嚟嘅影響。
非利息收入方面，Michael認為公司喺投資產品及銀行保險業務(I&I)方面有優勢，而渣打近年喺呢方面建立嘅形象亦非常唔錯，睇好公司I&I業務發展。
