【Now財經台】中芯國際(00981)股價喺業績前反覆向上，今日(27日)一度升逾8%，高見52.55元。人工智能(AI)概念及國產自強繼續係市場焦點，如果憧憬中芯交靚業績，想部署CALL輪博股價向上，建唔建議揀貼啲？
中信證券國際股權衍生品銷售經理李佳原指，中芯股價上月自高位回落，曾下試50天線水平，今日股價反彈已上返10天線樓上，資金趁業績前重新流入中芯。
佢續指，投資者可以考慮約6個月到期嘅CALL，8月、9月到期，價外30%至40%，槓桿做到4倍以上，李佳原又話，中芯引伸波幅大，即使價外30%至40%，對沖值仍相當足夠，可以保持到唔錯嘅敏感度。
