【Now財經台】吉利汽車(00175)今日(20日)中午派咗成績表，收入及純利都好過預期，派息比率約43%，係近年罕見嘅高水平，吉利股價午後拗腰向上，一度逆市升近5%，呢份業績邊方面令股價有咁正面反應？
艾德金融執行董事陳政深表示，主要有個原因，首先係去年尤其下半年，整個汽車市場「內捲」情況嚴重，產品同質化明顯，所以要突圍並唔容易，一定要品牌突出、個性鮮明，先可以站得住腳及突圍而出，吉利喺去年咁惡劣嘅環境下，全年銷售都可以超標，市場一定收貨。
Ryan續指，雖然吉利去年獲得嘅補貼較以往少，但收益、盈利增長、現金流增長都匹配，反映吉利銷售能力強。
成本控制方面，陳政深認為，吉利算係搶閘做平台化嘅車企，而喺去年競爭咁激烈嘅環境下，毛利率仍然keep到，亦交到一份唔錯嘅業績，所以市場都滿意。
