【Now財經台】安踏體育(02020)今日(19日)中午出咗業績，收入按年增長13%，去年就多賺逾50%，集團去年加快海外市場發展，將安踏及Descente品牌推去海外市場，並以東南亞市場為首站，其中，安踏品牌更推到中東、北美、歐州及非洲等市場，究竟依家係咪向海外推廣嘅好時機？加大資本及推廣開支會唔會令毛利率受壓？
南華金融集團副總裁莫灝楠指，安踏加大資本開支及推廣開支唔出奇，增加開支後嘅廣告及宣傳開支比率維持喺約9%，相比疫情期間嘅開支增長，現階段嘅廣告及宣傳支出仍受控。佢又指，安踏必須開拓其他新興市場，因為可以發展海外市場嘅企業唔多，愈多海外曝光代表品牌嘅影響力愈大，有助帶動毛利率。
Casper又話，若安踏股價出現調整，可以喺市盈率(PE)落到20倍以下適度買貨。
