【Now財經台】美國總統特朗普(Donald Trump)昨晚(27日)突然宣布再加中國貨10%關稅，即累計加20%關稅，其中，美國出口業務佔比最大嘅公司如創科實業(00669)、泉峰控股(02285)，股價今日(28日)竟跌得唔多，反而北美市場收入佔比較少嘅德昌電機控股(00179)、敏實集團(00425)跌得仲多，申洲國際(02313)及裕元集團(00551)就微跌和靠穩，點解讀呢個現象？
王道資本及家族資產管理執行董事黃敏碩指，單睇產業分布數字，創科可能有潛在問題，但佢嘅產品比較實務，未必係關稅主力針對嘅對象，最敏感始終係科技相關產品，所以都要睇返關稅未來嘅實施程度，雖然處於風眼，但本身唔係近期炒作主題，至於泉峰仍有90%產能來自內地，壓力就相對大，產能分散能力亦唔高，所以股價有可能仍未完全反映。
Michael又認為，汽車行業係風眼亦唔出奇，早前，歐盟通過向中國電動車徵收關稅，敏實提供唔少貨源比歐美客戶，所以業務層面比較敏感，對股價嘅影響亦較大，申洲及裕元主要從事紡織業務，唔算係關稅針對嘅第一梯隊，加上早已布局好東南亞廠房，成本控制較佳，因此，所受影響會較細。
